حالات انقطاع النفس المؤقت
حالات انقطاع النفس المؤقت
موضوع منشر جدا وللاسف الشديد بيكون التصرف فيه بطريقتين اولا : ان الاهل يتجاهلو المشكلة من الاساس ويقولوان ده شئ طبيعى او انهم يبداو يدورو على سبب المشكلة وهنا المعاناة لو ربنا وقعهم فى حد من غير المتخصصين وشخص الحالة انها تشنجات
طيب وعشان نفهم الموضوع بالتفصيل هحكيلكم الحوار اللى دار بينى وبين والدة طفل بيعانى من نفس المشكلة
السلام عليكم بص يا دكتور ابنى كل ما يعيط جامد او اخد منه حاجة غصب عنه او يتخبط بيجيله تشنجات ....
تشنجات ازاى يا مدام ممكن توصفيهالى ؟؟ بص هو بيعيط جامد ويقطع النفس وشفايفه تزرق وساعات عنيه بتغرب وبيقع على الارض كمان
طيب مفيش مرة بعد ما وقع على الارض جسمه اتنفض جامد وعنيه غربت وبقه اتعوج على جنب وشوية وهدى وراح فى نوم عميق ؟؟؟ ايوة يا دكتور حصلتله مرتين قبل كدة ...
طيب حصله الموضوع ده قبل كدة بدون عياط او حصلتله وهو نايم ؟؟ لا خالص عمرها ما حصلتله وهو نايم
ولا حصلتله قبل كدة وهو قاعد عادى من غير عياط او من غير ما يتخبط ؟؟؟؟ لا يا دكتور كل مرة لازم يكون بيعيط او بيتخبط او بيتعصب ..
طيب يا مدام ابشرى ابنك معندوش تشنجات خالص بس دى حاجة شبه التشنجات اسمها (حالة انقطاع النفس المؤقت )
ودى يعنى ايه يا دكتور ...؟؟؟ بصى يا ستى حالة انقطاع النفس المؤقت من اشباه التشنجات وهى الحمد لله من الحالات الحميدة اللى مش بتاثر على الطفل بشكل ملحوظ وهى عبارة عن توقف مؤقت لنفس الطفل بعد اى موقف مزعج او مؤلم زى انه يعيط جامد او يتخبط او تاخدى منه حاجة بالعنف سببها الاساسى هو انيميا نقص الحديد وفى الدراسات الاخيرة وجدنا ان معظم الاطفال دول بيكون عندهم انيميا نقص الحديد بالاضافة لضعف الجهاز العصبى
بس انا يا دكتور رحت لاكتر من دكتور قبل كدة وعملولى رسم مخ للطفل ولقو فيه بؤرة كهربا وكلهم قالو ان دى تشنجات .. ارجع واقول لحضرتك ان رسم المخ يساعد فقط فى التشخيص ولكنه لا يثبت او ينفى وجود التشنجات ده غير انه بيدى نتايج ايجابية فى حوالى 30 فى المية من البشر العاديين يعنى مينفعش نبنى التشخيص على رسم المخ فقط الحاجة التانية تعالى نفرق بين الحالة دى وبين التشنجات
اولا التشنجات حركات لارادية تحدث بدون سبب واضح انما هنا السبب واضح ومحدد ومش بيتغير ( لازم يعيط او يتخبط علشان تحصله )
ثانيا التشنجات ممكن تحصله وهو صاحى او وهو نايم اوفى اى وقت انما هنا لازم تحصل وهو صاحى ويكون فى قبلها مجهود او عياط
ثالثا التشنجات ليها وصف معين وشكل معين ممكن يبقى فى اضطراب فى درجة الوعى والطفل بيميل للنوم هنا وممكن يعمل حمام على نفسه بعد النوبة على عكس النوبات دى بتبقى ثوانى معدودة ومفيش بعدها اضطراب فى درجة الوعى
لا يا دكتور انا قلتلك قبل كدة انه حصله مرتين اتشنج بعد ما وقع الارض .. دى فعلا تشنجات بس مش بسبب وجود بؤرة كهربا ولكن بسبب نقص الاكسجين الواصل للمخ ودى بنسميها ( Post anoxic seizure ) وده بيحصل غالبا فى الحالات الشديدة او لو الحالة خدت وقت طويل لدرجة انها اثرت على درجة الوعى ودى الحالة الوحيدة اللى ممكن نوصف فيها دوا مضاد للتشنجات
طيب يا دكتور ربنا يطمنك طب ايه العلاج دلوقتى ؟؟ العلاج الاساسى بيكون عبارة عن اعطاء الطفل الحديد وايضا بعض الفيتامينات لتقوية جهازه العصبى والاهتمام بتغذية الطفل وحالته العامة وفى حالات قليلة ممكن نضيف دواء مضاد للتشنجات فى الحالات الشديدة الغير مستجيبة للادوية العادية
طيب يا دكتور هو ابنى هيفضل طول عمره كدة ؟؟؟؟ زى ما قلت لحضرتك ان السبب الاساسى لحالات انقطاع النفس المؤقت هو نقص الحديد بالجسم احنا لاحظنا ان الموضوع ده غالبا مبيحصلش قبل 6 شهور ولا بعد 6 سنوات وفى معظم الحالات التحسن بيكون سريع بمجرد مت نصلح الانيميا الموجود ونحسن الحالة العامة للطفل .. طيب يا دكتور ربنا يطمنك وكتر خيرك ...
اتمنى انى اكون قدرت اوصل الموضوع بطريقة سهلة وبسيطة لكل ام وكل اب
